5. المجرات والخروم السودا

في الاصل, زي ما شرحنا قبل كده, كان فيه سحب ذريه. السحب دي ابتدت تتأثر بقوة الشد اللي في الكون, وخصوصاً من الماده المضلمه اللي بتكون معظم الماده في الكون, وابتدت السحب دي تتجمع مع بعض في حتت وتفترق عن بعض في حتت. وزي ما شوفنا, في قلب السحب دي ابتدى مولد النجوم. وعشان النجوم دي أجسام هي كمان, قوة الشد اللي مابينهم برضه ابتدت تجمع النجوم مع بعض في حتت وتفرقهم عن بعض في حتت. يعني من قلب السحب الذريه, ابتدي مولد النجوم, وبعدين تجمعات كبيره من النجوم (Constellations, or star clusters)ـ

صوره بتوضح إزاي النجوم بتتجمع مع بعض بقوة الشد

صوره بتوضح إزاي النجوم بتتجمع مع بعض بقوة الشد

المجره (Galaxy) هي الإسم اللي بيتقال على نظام متكامل في الكون, هو نظام كل الأجسام فيه ماشيه بقوة النطر وبيجمع جواه تجميعات كتير أوي من النجوم والسحب الذريه والعفره الذريه. بس كل دول ما يعملوش غير 10% من كل الماده اللي جوا المجره, والباقي كله, 90%, الماده المضلمه اللي احنا لسه مش فاهمنها كويس أو خالص! المجرات الأولى ابتدت تتكون 750 مليون سنه بعد الانفجار الكبير, ودلوقتي بقى فيه تقريباً 170 بليون (170,000,000,000) مجره في الكون على قد ما احنا قادرين نشوف. وغالباً اكتر من كده. فيه مجرات صغيره, العلماء بيسموها المجرات الأقزام, ودي بيبقى جواها حوالي 10 مليون نجمه, وفيه مجرات كبيره (أو عملاقه“) بيوصل عدد النجوم فيها لـ ميت تريليون نجمه

مجره

مجره

مجموعة مجرات مربوطين مع بعض بقوة الشد

مجموعة مجرات مربوطين مع بعض بقوة الشد

لحد الوقتي في اختلاف مابين العلماء على تفاصيل تاريخ بداية المجرات في الكون, لكن كده أو كده الأكيد هو إن المجرات اتكونت كمان بسبب قوة الشد اللي فضلت تجمع النجوم والأجسام اللي مابين النجوم مع بعض في مجموعات. المجرات ليها اشكال وأنواع مختلفه, وكلها واضح فيها عنصر اللف والدوران حولين نقطة إرتكاز دايماً بتكون في مركز المجره. معظم المجرات بيبقى ليها دراعات من النجوم طالعين من مركزها بأشكال مختلفه

اشكال مختلفه من المجرات

اشكال مختلفه من المجرات

لكن لو المجره ممكن يكون جواها ملايين الملايين من النجوم, إزاي ممكن كل ده يتجمع مع بعض, وأنهى قوة شد دي اللي ممكن تفضل تشد ملايين ملايين النجوم بالطريقه دي؟

الحقيقه إن فيه حاجه إسمها الخرم الأسود(Black hole)جوا قلب كل مجره, وهو اللي بيمسك المجره كلها حوليه ويخليها تلف وتدور حولين منه. في الحقيقه الخرم الأسود ده مش خرمفاضي مافيش جواه حاجه. الخروم السودا في الأصل كانت نجوم كبيره جداً, لما انفجرت اتجمع في قلبها ماده كتيره جداً وبقيت قوة الشد اللي جواها قويه جداً, لدرجة إن منطقة الشد بتاعتها بقيت كبيره وواسعه وممتده جداً, ومافيش أي حاجه جوا منطقة الشد بتاعة الخرم الأسود ممكن تحقق سرعة الهروب“. ومره تانيه: الخرم الأسود هو جسم كان غالباً في الأصل نجمه كبيره أوي, انفجرت وجمعت جواها ماده وكتله كبيره جداً, فبقيت منطقة الشد بتاعتها قويه وابتدت تشد أجسام تانيه كتير حوليها وتركز الكتله اللي جواها أكتر وأكتر, لدرجة إن في الآخر قوة الشد بتاعتها مابتسمحش لأي حاجه جواها إنها تحقق سرعة الهروب منها, حتى النور نفسه. وعشان كده احنا بنسميها خروم سودا, عشان بتشد كل حاجه ليها حتى النور, وعشان بالنسبالنا هي دايماً ضلمه مابتطلّعش أي نور. وعشان كده احنا لسه مش قادرين نعرف الخروم السودا جواها أيه بالظبط ومش عارفين ندرسها كويس. آدي حكاية الخروم السودا بمنتهى البساطه

تصور خيالي للخرم الأسود

تصور خيالي للخرم الأسود

 لازم نأكد هنا على إن الخرم الأسود بيشد الأجسام اللي حوليه بنفس قواعد ميكانيكا الشد اللي شرحناها من شويه. يعني مش بيشفط أي حاجه جواه كده وخلاص, لكن الأجسام والنجوم بتفضل تلف حوليه زي أي جسم تاني. وغير كده, فيه مجموعات كتير من النجوم بتلف حولين الخرم الأسود في مدار سابت زي اللي شرحناه قبل كده, من غير ما تقرب منه كفايه عشان يبدأ يشدها نحيته بانتظام لحد ما تدخل فيه وتبقى جزء منه. لكن في نفس الوقت النجوم, وأي جسم, لو قرب بدرجه معينه من الخرم الأسود, يبقى أكيد هايفضل يتشد ليه لحد ما يدخل جواه. وعشان كده الخروم السودا قوة الشد بتاعتها بتبقى قوية أوي, عشان تركيز الكتله اللي جواها بالنسبه لمساحتها بيبقى كبير جداً وبيفضل يزيد

فيديو: تصور خيالي لتأثير الخرم الأسود على مجره بحالها

فيديو: تصور خيالي لتأثير الخرم الاسود على سحابه ذريه كبيره

علاقة المجرات ببعض, وكمان علاقة الخروم السودا ببعض, زي علاقة النجوم وكل الأجسام اللي في الكون ببعض. يعني ممكن مجرتين بحالهم يشدو بعض ويدخلو في بعض, أو يلفو حولين بعض بنظام الإجواز. ونفس الحكايه بالنسبه للخروم السودا. الخروم السودا لما بتخش في بعض مساحتها وكتلتها بتزيد لدرجة إنها ممكن تبقى بليون مره قد الشمس أو أكبر, وإسمها الخروم السودا العملاقه (Super massive black holes)!! وهو ده نوع الخروم السودا اللي بيبقى موجود في مركز المجرات

فيديوهات تصور خيالي لدخول المجرات في بعض

المجره بتاعتنا, يعني اللي الشمس والأرض جزء منها, إسمها مجرة سِكة اللبن” (Milky Way)!! إسمها كده عشان لما بنشوفها من الأرض, بتبان في صورة قوس ممتد في السما منور بلون أبيض شبه اللبن. إزاي بنشوف المجره من على الأرض, واحنا مجرد جزء منها؟ الحقيقه إن سِكة اللبن واخده شكل قرص مسطح ليه أربع دراعات, والشمس موجوده على مسافه بعيده من قلب المجره في واحده من دراعاتها, تقريباً على مسافة تلتين من قلب المجره وتلت من نهاية دراع المجره. لما بنبص ناحية قلب المجره واحنا عند الدراع, بنشوف تجمع النجوم المتركز حولين المركز في شكل قرص كبير منور بنور أبيض. يعني القرص الأبيض اللي احنا بنشوفو ده هو تجمع النجوم الكبير حولين مركز المجره بتاعتنا

مجرتنا: سِكة اللبن

مجرتنا: سِكة اللبن

مكان الشمس بالنسبه لمركز سِكة اللبن

مكان الشمس بالنسبه لمركز سِكة اللبن

سِكة اللبن بتعتبر مجره حجمها متوسط بالنسبه لباقي المجرات في الكون, وفيها حوالي من 200 لـ 400 بليون نجمه! وفـ مركزها فيه خرم أسود عملاق زي اللي موجود في قلب معظم إن ماكانش كل المجرات. كل النجوم والسحب الذرية والأجسام اللي في المجره بتدور حولين الخرم الأسود اللي في مركزها بسرعه مختلفه مابين 552 و630 كيلومتر في السنيه. سِكة اللبن عمرها كبير جداً, حوالي 13.2 بليون سنه, يعني اتكونت بدري قوي بعد الانفجار الكبير اللي حصل من 13.7 بليون سنه

سِكة اللبن مربوطه مع مجره تانيه إسمها أندروميدا بنظام الإجواز, يعني المجرتين بكل النجوم والأجسام اللي فيهم بيلفو حولين بعض وعمالين يقربو من بعض شويه شويه, ومتوقع يبدأو يدخلو في بعض بعد 4 بليون سنه تقريباً

المنظر من الأرض, لدخول مجرتنا (سِكة اللبن) مع مجرة اندروميدا المتوقع يحصل بعد 4 بليون سنه تقريباً

المنظر من الأرض, لدخول مجرتنا (سِكة اللبن) مع مجرة اندروميدا المتوقع يحصل بعد 4 بليون سنه تقريباً

المجرتين دول هما كمان جزء من مجموعة مجرات أكبر إسمها المجموعه المحلي” (Local Group) فيها 54 مجره, كلهم مربوطين ببعض بقوة الشد. بعد كده المجموعه المحلي دي نفسها جزء من تجمع أكبر من المجرات اللي مابينها ترابط بقوة الشد برضه, إسمها مجموعة فيرجو الكبيره” (Virgo Supercluster), ودي فيها على الأقل 100 مجره

ومن كده بيوضح قد أيه ميكانيكا الكون بتنطبق على كل حاجه في الكون من لحظة ما ابتدا: وأول ما قوة الشد اتكونت في الوجود, ابتدى يبقى ليها هي الكلمة الأخيره في تكوين كل حاجه وتحديد مصير كل جسم. زي ما النجوم اتولدت في السحب الذريه وابتدت تلف وتدور, وتجمع الكتله والماده في مركزها وتنفجر وتبقى خروم سودا, تجمعات النجوم كلها ابتدت تلف حولين الخروم السودا وتتجمع في شكل مجرات. المجرات دي كمان بتلف حولين بعضها وبتشد بعضها في مجموعات كبيره, والمجموعات الكبيره دي نفسها هي كمان مربوطه بمجموعات تانيه أكبر. المسافات والمساحات هنا حاجه مانقدرش أبداً نتخيلها بعقلنا الإنساني, ومانقدرش نستخدم مفاهيم الكيلومتر أو الدقيقه عشان نوصفها. حاجه ممكن تكون جميله بالنسبه لبعض الناس, أو مخيفه, أو روحانيه بالنسبه لناس تانيين! الأكيد إن الصوره الكبيره دي بتخلينا نحس, أو على الأقل نفهم, قد أيه احنا كبشر عايشيين على الأرض, حجمنا صغير جداً, وما نعرفش عن تفاصيل الكون غير معلومات قليله جداً

وفي الآخر, لازم نأكد على إن المجره فيها حاجه مهمه جداً, وهي إنها مش مجرد مجموعه من النجوم مربوطين ببعض بقوة شد الخرم الأسود اللي في مركز المجره وخلاص, لاكن كمان هي نظام متكامل فعلاً. كل العناصر والمواد اللي فيها بتفضل دايماً جواها, وبتحافظ على الطاقه والماده اللي فيها. وبكده, لما نجمه تنفجر وتموت, عناصر النجمه دي بتتنقل لحته تانيه في المجره وتتجمع تاني بقوة الشد, وبكده بتستمر السحب الذريه ويستمر مولد أجيال جديده من النجوم

———————————————-

اللي قبله: 4. ميكانيكا الكون وعناصره الأوليّه

اللي بعده: 6. ختام الجزء الأول من الموسوعه

***

الفهرس

استفتاح

1. أيه هو الكون وإزاي بنشوفه

2. الانفجار الكبير, مولد الكون

3. مولد النجوم

4. ميكانيكا الكون وعناصره الأوليّه

5. المجرات والخروم السودا (انت هنا دلوقتي)

6. ختام الجزء الأول من الموسوعه

7. فِكره عن النظام الشمسي (الجزء التاني)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s