عِدِّة الصيد


عِدِّة شبك:ـ

 

غـَزل (عام, أوقات “شـَعر” في بحري) / شُجَّه (shogga) (بدو سينا): مصطلح عام, معناه كل أنواع الشبك. بيبقى معمول من خيوط الحرير أو النايلون ([البتووت]) والفتحات مابين الخيوط (الـ[ماجه] أو العيون) مساحتها بتفرق حسب الصياد عايز يصطاد أيه. طُرُق الصيد بالغزل كتيره

غزل / شـَجّه / شبكه

غزل / شـَجّه / شبكه

تفصيل الشبك

ـ1ـ فِل (عام) / طـَفـّاف (Taffaf) أو صَبّاي (Sabbay) (بدو سينا):ـ الفِل هو اللي بيمنع الحبل اللي فوق (الوتر أو الشاموط) إنو يغطس لتحت في الميه. الفِل في مصر عادة لونه بيبقى أحمر, بس الصبّاي بيبقى معمول من فِل لونه أبيض

ـ2ـ وتر (جُبلي) / شـَمّووط (فيوم) / عِربه (بدو سينا) / مَد (او) مولخ (البرلس) / حبل (بحر احمر):ـ الحبل اللي ماسك الشبكه من فوق

ـ3ـ خيط (عام) / جِنطار (بدو سينا):ـ الخيط اللي بيبقى مربوط في الحبل الفوقاني وبيبقى نازل منه الشبك. ربط الخيط في الحبل بيتسمى “جَنطره” في لغة بدو سينا

ـ4ـ وِش (أو) بَدَن (جُبلي) / عين أو عيون (عام): يعني الفتحات اللي مابين الخيوط

غطّاس (أسوان) / تئالات (عام):  أي حاجه تقيله مربوطه بالشَبَك اللي بيترمي في الميه, بيوصل لأرض الميّه عشان يحافظ على الشَبَك في مكانه. غالباً التئلات بتبقى حجاره كبيره وتقيله, بس اوقات في اسوان بيستخدمو براميل تقيله

تفريده و شبك

الغطاس او التئالات هي اللي بتمنع الجزء التحتاني من الشبكه إنو يطفو لفوق. حسب حجم الشبكه وطولها بيترمي عدد معين من التئالات

أسامي لأنواع الشبك:ـ

كـَنار (البرلس, بحر ابيض): إسم نوع شبك مبطن وقوي

كوبَك (Kobak) (أسوان) / خنّاج (قِنا): إسم نوع شبك حجمه كبير

هَبو (Habw) (عام): نوع شبك عيونه (يعني الفتحات اللي مابين خيوطه) صغيره اوي, ممنوع من الاستخدام عشان مش بيستخدم إلا لصيد الـ[زريعه] أو السمك اللي لسه مولود عشان يتاخد من الميه على المزارع الخاصه

مصطلحات عامه في عِدِّة الشبك:ـ

دوُره (Doora) (جُبلي, غير دوُره في البرلس بمعنى طريقة صيد) / خُن (عام, غير خُن بمعنى مكان في المركب) / سِـيـّا (نادر, غير سِـيـّا بتاعة طريقة التئديف) / بَطنيّه (Batneyya) (المنزله, السويس) / حِجْر (7egr) (البرلس):ـ

اللفِّه أو الدوران أو الكيس اللي بيبقى موجود في أماكن معينه في الشبكه (خصوصاً الـ كذا راءه أو الشبك المبطن), اللي بتخش فيه السمكه وتتحجز ماتعرفش تطلع تاني. غالباً ليها أسامي كتير كده عشان بتتطلب حرفيه عاليه في صناعة الشبك

راءه (Ra2a) (عام): يعني طبقه. بتتقال على الشبك لما يكون معمول فيه أكتر من طبقه (كذا راءه)ـ

فـَلَنكه (فيوم): ماسوره مَعدن, بتتشد بقوه على الـ[أورِمه]) في مقدمة الفلوكه, ويتخبط عليها بقوه عشان تعمل صوت قوي يخلي السمك يتحرك ناحية الشبكه. بتستخدم مع ألات تانيه بتعمل صوت موسيقي قوي في موسم الصيف في الفيوم

ماسك (بحر أحمر): كلمه انجليزي (Mask), معناها “قِناع”, بتتقال على نضارة الميه وماسوره صغيره واصله مابين خشم اللي بيعوم والهوا فوق وش الميه عشان يتنفس منها. بيستخدمها الصيادين البدو في جنوب سينا عشان يحددو مكان السمك ويعرفو يرمو الشبكه ويعملو [تحجير] فين

الماسك

الماسك

مَخيَط (فيوم) / مَختَر (جُبلي) / مُنئاش أو إبره (البرلس): أداه صغيره (10×1 سم) على شكل H, في جُبلي لسه بتتعمل من الجريد زي زمان, بس في البرلس ووجه بحري معظمها دلوقتي معموله م البلاستيك. بيبقى ملفوف في وسطها خيط زي بتاع الشبك. بتستخدم في [مَرمِّة] او [ترقيع] الغزل, يعني معالجة الشبك لما يكون مقطوع

المخيط في اسوان, لسه بيتعمل من الجريد. غالباً دلوقتي بيبقى معمول من البلاستيك

المخيط في اسوان, لسه بيتعمل من الجريد. غالباً دلوقتي بيبقى معمول من البلاستيك

مِدرَه (عام, واوقات مِدرايه) / روومه (السويس): عصايا طويله (تقريباً من متر لمترين) معموله من البامبو أو البوص الهندي أو البوص الفارسي (الفيوم), أو البوص الرومي (السويس). الصياد بيضرب بيها بقوه على الميه أو يخبط بيها على الحجر اللي في أرض الميه باستمرار وبقوه عشان يخُض السمك في مكان معين ويخليه يجري ناحية الشبك

النـَطخ في الفيوم

النـَطخ في الفيوم

====

عِدِّة سِنار:ـ

 

سِنّار (عام) / جَلَب (السويس) / حَسَك (بدو سينا):ـ

Hook with textإبره (عام): الجزء المدبب الحاد الأمامي في السناره

رجووعه (عام) / سِن (بدو سينا): الجزء المدبب الحاد اللي جاي بزاويه منفرجه مع الإبره, عشان يضمن أو يزود صعوبة هروب السمكه من السنار

دئن (عام) / جَعر (بدو سينا): الجزء الأخير في السنار, اللي بيتربط فيه الخيط

عَمرَه (بدو سينا): ربط سنارتين في خيط واحد

مشَنّه (عام): إسم القفص اللي الصياد بيحط فيه خيوط السنار وبيرص حولين إطاره السنون وكل العِدَّه اللي هاتترمي في الميه, في الأصل كان بيتعمل من خيوط الخيش القوي بس دلوقتي عادة بقى جردل بلاستيك كبير. بيتلف حولين إطاره فِل مقوى عشان سنون السنار تشبك فيه

المشنه

المشنه

ترتيب السنانير في المشنه

ترتيب السنانير في المشنه

====

 عِدَّه عامه:ـ

شِلب (البرلس) / مِلئاف, كُبشه (مطريه, منزله, سويس): عدة لم السمك في صيد الـ[دوُره]. عباره عن شبكه عامله زي الكيس, مقفوله من ناحيه ومفتوحه بطوق حديد من الناحيه التانيه. بيمسكها الصياد في إيده ويلم بيها السمك المحبوس في الـ[عِلبه]. جمعها “إشلاب”ـ

شلب

شلب

طاوله (جُبلي): صندوق أو جردل صغير في المركب, بيتحط فيه السمك اللي الصياد اصطاده.

P1010927

طاوله

طاوله

طُعْمْ (عام) / لَعَف (La3af) (بدو سينا): أي حاجه بتُستخدم كأكل جاذب للسمك اللي الصياد عايز يصطاده. في معظم الحالات الطُعم هو نفسه بيبقى سمك, لكن أوقات كتير ممكن يبقى حاجه تانيه: مسلاً الهواه بيستخدمو دوود الأرض لصيد سمك النيل, واوقات كتير الصيادين بيحطو عيش ناشف في صيد [الجابيا]. نوع الطُعم ده عِلم وخبره كبيره في الصيد, وعشان الصياد يصطاد أنواع معينه من السمك, لازم يتعلم يستخدم أنهي نوع من الطعم بالظبط

لعف / طـُعم

لعف / طـُعم

غانجو (بحر أبيض) / وجَله (Wagala) (بحر أحمر) / خَطـّاف (جُبلي): حديده طويله متنيه ومُدببه من واحد من أطرافها, بتستخدم في رفع السمكه الكبيره بعد صيدها عشان تمنع احتمال فلاتنها من السناره أو قطعها لخيط السناره. أصعب لحظه في صيد السمك الكبير هي لحظة طلوعه من الميه, عشان بيحمِّل تُقله أكتر على الخيط والميه بتبقى ماعادتش شايلاه. في جُبلي, الأداه دي إسمها “خَطـّاف” والبوز الحديد المدبب بيبقر راكب في عود خشب. كِلمة “وجَله” غالباً اصلها قبطي: ⲁⲩϫⲁⲗ بمعنى هِلب أو أداه معموله من الحديد المُدبب. بيتقال: “إوجِل السمكه”ـ

غانجو (بحر أبيض) / وجله (بحر أحمر)ـ

غانجو (بحر أبيض) / وجله (بحر أحمر)ـ

مِحيه (بحر احمر) / عيّاشه (فيوم) / حَبّاس (البرلس, بحر ابيض): شبكه صغيره مفتوحه من ناحيه ومقفوله من ناحيه تانيه, غالباً على شكل قرطاس, واوقات بتبقى هي نفسها الـ[شِلِب]. الغرض منها هو المحافظه على السمك اللي الصياد اصطاده حي في الميه لحد ما خلص صيد, عشان السمك يفضل طاظه عبال ما يجي يطلع يبيعه

====================

فهرس القاموس:ـ

استفتاح

طُرُق الصيد

عِدِّة الصيد (انت هنا دلوقتي)ـ

مكونات وصناعة المراكب

أنواع المراكب

الملاحه

الطبيعه

الحبال والخيوط, أنواعها وربطاتها

=======================

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s