الملاحه

عِدَّه

إسكانديل (Eskandeel) (أو) سونار (عام): مكنة السونار اللي بتوري قبطان السفينه في مراكب الصيد الآلي درجة العُمق والتضاريس تحت الميه. الإسكانديل إسم قديم لأداه يدويه كانت بتتغطس في الميه عشان تدي معلومات تقريبيه عن العمق والتضاريس زي السونار. اوقات الصيادين كانو بيقولو على السونار “إسكانديل بالكهربا”!ـ

فيديو بيشرح طريقة عمل الاسكانديل

برووصي (Brousi) (بحر أحمر, سويس) / مِخطاف (بحر أبيض) / هِلب (عام: جُبلي, فيوم, برلس, منزله, وجه بحري) / فَدْج (Fadg) (بدو سينا) / وبعض الصيادين بيتمنظرو ويقولو أنكور” (Anchor) وهو الإسم الانجليزي:ـ

عِده تقيله عادةً من الحديد التقيل, ليها اشكال كتير لكن عادة دايماً ليها قرون حاده زي الشوكه بتمسك في قاع البحر. بتتربط بحبل في المركب (في [الشمعه]) وتترمي في البحر لحد ما توصل لأرض الميه. الحديد المُدبب ده بيتغرز في أرض الميه وبكده بيسبِّت المركب في مكانها بدل ما تروح مع الموج أو التيار. فيه كلمه قبطيه (ϩⲁⲩϫⲁⲗ) بتتنطق هوجِل (بمعنى هِلب), فيه احتمال إنها تكون أصل كلمة هِلب, ولو إن الاختلاف الفونولوجي (الصوتي) مابينهم كبير شويه

الهـِلب

الهـِلب

هِلب, بحريرة قارون, الفيوم

هِلب, بحريرة قارون, الفيوم

بُشليله (بحر أحمر): نوع من الـ[هِلب]: اداه حاده من الحديد ليها تلات قرون طوال, بتتربط بحبل في المركب وتترمي في البحر وترشق في أرض البحر عشان تِسبّت المركب. البُشليله بالذات نوع الحديد بتاعها طري شويه, بينفرد لما يتسحب جامد. بيُستخدم في المناطق اللي فيها شُعَب مرجانيه (البحر الأحمر) عشان بعكس الهِلبلما يشبك فيهم ينفع يتسحب منهم تاني

البُشليله

البُشليله

رُباط: الحبل اللي بيبقى مربوط فيه الـ[الهِلب] أو [البُشليله]. بيبقى معمول من الجنزير في مراكب الصيد الآلي

رَوّاش (فيوم): اختراع فيومي مالقيتلهوش وجود في أي حته تانيه في مصر: جهاز صناعي بيطلع نور زي سارينة الإسعاف (يعني النور بيلف في كل الاتجاهات) وبيشتغل بالبطاريه وبيتركب على عصايا طويله طافيه بالطول على الميه. الغرض منها هو إنها تدل الصياد على المكان اللي رمى فيه شبكه عشان يعرف يرجعله تاني

رواش, الفيوم

رواش, الفيوم

صابوره (السويس): أي حاجه تقيله (جِركِن ميه, حَجَر, …) بتتحط في جنب معين في المركب عشان تعدل التوازن لما يبقى فيه ميل

غريزه (أو) غـُرز (البرلس): خشبه قويه مغروزه في الارض على البر قـُرب الشط عشان تتربط فيها المراكب

غرز, بحيرة البرلس

غرز, بحيرة البرلس

فَدْج (Fadg) (بدو سينا): طوبه كبيره وتقيله بتتربط بحبل في المركب وتترمي في البحر لحد ما توصل لقاع البحر, عشان تسبت المركب. بيستخدمها البدو في مراكبهم الصغيره زي الهِلب. شوف [برووصي]ـ

مِدرَه (عام, واوقات مِدرايه) / روومه (السويس): عصايا طويله (تقريباً من متر لمترين) معموله من البامبو أو البوص الهندي أو البوص الفارسي (الفيوم), أو البوص الرومي (السويس)., بيتزأ بيها المراكب والفواليك في النيل والبحيرات اللي مافيهاش عُمق كبير. مُعظم الوقت بيبقى هي نفسها الـمِدرَه (راجع عِدِّة الصيد

المِدره وسيلة ملاحه مهمه في النيل

المِدره وسيلة ملاحه مهمه في النيل

مَكَنه: ماتور (Outboard motor)ـ

المكنه

المكنه

 ====

أفعال

تـَدمييغ, دَمْغ, إدمُغ (بحر أحمر): طريقه معينه لربط حبل الهِلب, عشان لو شبك في شُعب مرجانيه تسليكه يبقى أسهل. بيتقال: “إدمُغ الهِلبـ

تزهيد (يزهِّد) (بحر أحمر/سويس): عملية حساب هندسيه لتحديد أي مكان محدد في البحر, الصياد بيحدد نقطتين أو أكتر يكونو سابتين على البر ويربطهم بالمكان اللي هو عايزه في البحر, عشان يعرف يرجع لنفس المكان تاني. الحكايه دي مهمه عشان أوقات الصياد بيسيب الشبك أو السنار في البحر ويرجع يلمه بعدها بيوم, أو عشان بيكون اكتشف وفره في نوع سمك معين في مكان محدد بيكون عايز يفضل يرجعلو تاني. نقدر نقول إن التزهيد هو نوع من الـ GPS أو نظام إحداثيات طبيعي

التزهيد, نظام إحداثيات هندسي طبيعي: الخطوط الحمرا مربوطه بمكانين واضحين في الجبل ومكان شروق الشمس, والخطوط البيضا مربوطين بظواهر تانيه ثابته على الشط التاني. نقطة تجمع الخطوط كلها هي نقطة التزهيد, اللي الصياد أو المراكبي عايز يرجعلها

التزهيد, نظام إحداثيات هندسي طبيعي: الخطوط الحمرا مربوطه بمكانين واضحين في الجبل ومكان شروق الشمس, والخطوط البيضا مربوطين بظواهر تانيه ثابته على الشط التاني. نقطة تجمع الخطوط كلها هي نقطة التزهيد, اللي الصياد أو المراكبي عايز يرجعلها

تزويد (البرلس): استخدام الـ [مِدره] (عصايا طويله بتوصل للأرض) في تحريك المركب بالزَق

توْسييع و رَدْ (عام) / كَشف و رَفع (فيوم): وقت لَم الشبك أو خيط السنار, يعني تطليع [الشَرَك] أو الشبك من الميه, التوسييع هو البُعد بالمركب عن خيط الشَرَك أو الغزل, والرَد هو القُرب من الخيط (أو المشي وراه على مسافه قريبه). النوع ده من الحركه بيبقى مهم عشان لَم الخيط يبقى أسهل وعشان مايتكلكعش ([يحيَّص]) في بعضه, وخصوصاً لما المركب تبقى ماشيه بالمِئداف مش بالمكنه

جَشْعْ, يجشَع, إجشَع (الطور, البحر الأحمر): لفظ بيستخدم لـ سحب أو فك” [البُشليله] أو [الهِلب] من على الأرض. بيتقال إجشَع البُشليله“.

ضَرب العين: يعني النظر في اتجاه الأفق في البحر. بيتقال إضرب عينك ناحية كذاـ

سوا (بيتقال, ع السوا) (عام): يعني التئديف باليمين والشمال قد بعض عشان المركب يفضل ماشي في خط مستقيم

تأديف ع السوا

تأديف ع السوا

سِيّا (Seyya) (عام) / رَد (فيوم): تحريك المِئداف في الميه من قدام لورا. غير سِيّا بمعنى مكان دخول السمكه في مكان معين في الشبكه

شَبط (Shabt): مصطلح عام بيتقال لما [الهِلب] أو الاحبال المختلفه أو خيوط الصيد تِشبُك في حاجه في البحر. بيتقال “الهِلب شَبَطـ

مُستـَعمِل (mosta3mel) (البرلس): يعني ماشي بالشراع, يعني الريح بيمشي المركب بالشراع

مِشال (أو) مرسى (غير المرسى على البر) (عام): أي مكان يختاره الريس لبيات المركب جوه البحر. بيتقال: أدخل مِشال

نَجْفْ, نَجَفِت (الطور, البحر الأحمر): لفظ بيستخدم لما [البُشليله] أو [الهِلب] يفك لوحده من أرض الميه (غير جَشع, شوف فوق). بيتقال البُشليله نَجَفِتـ

 ============================

فهرس القاموس:ـ

استفتاح

طُرُق الصيد

عِدِّة الصيد 

مكونات وصناعة المراكب

أنواع المراكب

الملاحه (انت هنا دلوقتي)ـ

الطبيعه

الحبال والخيوط, أنواعها وربطاتها

=======================

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s