طُرُق الصيد

بالشبك:ـ

Seine fishing (or seine-haul fishing)

ـ 1 ـ

تفريده (عام) / نـَشـّه (nasha) (البرلس) / بَصتاتو (Bastatoo) (بحر احمر

Tangle net (or) Gillnet

 

من اشهر وابسط طرق الصيد في مصر. فرد الشبكه بشكل معين (فيه اشكال مختلفه حسب نوع السمك وحسب عُمق الميه), وبعدين الضرب على الميه بالـ[مدره] (عصاية الصياد الطويله) عشان السمك يتحرك ناحية الشبكه

تفريده و شبك

التفريده

التفريده

فيديو: رمي التفريده

فيديو: اللم

 

ـ ضَرب أو غـَزغـَزه (جُبلي) / تطفيش (بحر أحمر, وجه بحري) / كَركَبه (Karkaba) (السويس, منزله) / جووشه أو تطوييس (البرلس) / دُبـّاكه (Dobbaka) (أو) نـَطخ (Natkh) (فيوم) / تحجير (بدو سينا):ـ

 كلها أسامي مختلفه لنفس الفكره, وهي التخبيط على وش الميه بقوه وبطريقه تعمل صوت وحركه تخلي السمك يتحرك ناحية الشبكه. عادة أداة التخبيط على الميه بتكون الـ[مِدره] (عصاية الصياد الطويله). في البحر الأحمر, بدو سينا بيعومو بنفسهم في الميه عادة وهما لابسين [ماسك] (يعني نضارات ميه وفتحة تنفس) وبيبصو ع السمك تحت الميه, وبيضربو سطح الميه بإيديهم ورجليهم وهما بيعومو. الغـَزغـَزه مختلفه شويه عن الضرب فإن الصياد بينزل المِدره تحت الميه ويخبط بيها على أرض الميه عشان يطلع السمك المستخبي في الصخور او الخِنان. في الفيوم, الفرق مابين المصطلحين هو إن الدُبـّاكه هي الخبط على الميه, والنـَطخ هو الخبط في المركب نفسها عشان تعمل صوت. الفيوميه بيستخدمو آلات موسيقيه (زي حاجه بيسموها الـ[فـَلَنكه]) مربوطه في تجويف الـ[أورِمه] في مقدمة الفلوكه, بتعمل صوت قوي, عشان تأثير الصوت على السمك يبقى أقوى

النـَطخ في الفيوم

النـَطخ في الفيوم

natkh

الغزغزه في أسوان, غير الضرب على وِش الميه, هي الدق فوق الحجر اللي السمك ببقى مستخبي تحتيه

الغزغزه في أسوان, غير الضرب على وِش الميه, هي الدق فوق الحجر اللي السمك ببقى مستخبي تحتيه

فيديو: التحجير (بدو سينا)ـ

ترجيد (جُبلي): فرد الشبكه مفروده فترة الليل كله ولمها الصبح

حُني (7ony) (أو) حانيه (أو) كَسره (فيوم) / كوزلوك (البرلس): طريقة فرد الشبكه بميل أو بشكل معين, يا إما على شكل زيجزاج أو على شكل دواير متداخله (خصوصاً عشان صيد سمك الموسى أو البوري في الفيوم)ـ

ـ شـُغل (جُبلي): يعني فرد الشبكه على شكل حدوة حصان

ـ2ـ

جُرّافه (Gorrafa – أو اوقات جارفه) (عام) / هَبله (أو) دوَّار (جُبلي) / جووفه (البرلس

 Surround Seine 

طريقة صيد بالشبك, بتحتاج درجه أعلى من المهاره والشغل (مقارنة بالـ[طُرَّاحه] أو الـ[تفريده] مسلاً). الصياد بيلف بالمركب ويرمي الشبك على شكل دايره كبيره وواسعه (حسب طول الشبكه), لحد ما طرفين الشبكه يرجعو يتقابلو تاني يا إما على البر أو على مركب. الطرفين دول بيتشدو مع بعض بانتظام وتوازي ف الشبكه تبتدأ تصغر وتقفل ع السمك اللي اتحبس جوا الدايره. في الناحيه المقابله لطرفين الشبكه فيه كيسطويل خارج من الشبك بالطول, كل اما دايرة الشبك تديق, كل ما السمك يخش جوا الكيس المقفول ده ومايعرفش يطلع تاني. الشبكه بتتلم لحد ما الكيس يطلع. “الجووفه” غالباً بتبقى من غير الكيس اللي في طرف الشبكه

الجُرّافه

الجُرّافه

فيديو: المرحله الأخيره من لم شبك الجُرافه

فيديو: تطليع الكيس (جُرافه)ـ

ـ3ـ

طـَرّاحه (أو طـُرّاحه) (Tarra7a) (عام) / شاعه (بدو سينا) / خـَدَّاجه (منزله, مطريه, بحري

 Cast Net

طريقة صيد بالشَبك قديمه وبقيت مش منتشره أوي في مصر دلوقتي عشان مابتجبش سمك اوي. الشبكه بتبقى مقفوله من ناحيه ومفتوحه من ناحيه تانيه. الناحيه المقفوله بيبقى مربوط فيها حبل لافف على إيد الصياد الشمال, والناحيه المفتوحه بيبقى مربوط فيها تئالات [رصاص] عشان تغطَّس الشبكه. الشبكه بتتحِدِف (تتطِرِح) بطريقه معينه على وِش الميه تقوم الناحيه المفتوحه من الشبكه تنفِرِد على شكل دايره وبعدين تغطس. وشويه شويه الصياد يبدأ يشد من الناحيه اللي عنده (المقفوله), تقوم الشبكه شويه شويه تِقفِل على السمك اللي تحت الشبكه. اوقات بتتنطق طـُرّاحه

عَم محمد مِرزه, صياد طُرّاحه في بحيرة البرلس

عَم محمد مِرزه, صياد طُرّاحه في بحيرة البرلس 

فيديو: بيشرح طريقة مسك الشبكه قبل حدفها

فيديو: عم محمد مِرزه من برج البرلس بيشرح طريقة رمي الشبكه

فيديو: صيد الطراحه في بحيرة البرلس

ـ4ـ

بـَشنين (بحري, أو مشنقه في القاهره) / جانِب (البرلس):ـ

طريقة صيد مرتبطه بموسم تواجد السمك في مناطق تجمع نبات الغاب أو الهيش في مناطق معينه في النيل أو البحيرات. الصياد بيحاوط الغاب بالشبك من كل ناحيه على شكل دايره واسعه (حسب مساحة الغاب), وبعدين بيقرب من الغاب ويِحشـّه أو يقـُصّه, ف السمك يتحرك ناحية الشبك. عشان كده مناطق تجمع الغاب دي دلوقتي بقى بيحصل عليها خناقات كتير وابتدى يظهر صراعات على ملكيتها“!!ـ

ـ5ـ

حَدر (أو) حَدّاري (جُبلي) / عوّام (البرلس, واوقات في جُبلي كمان

Drift Net

طريقة صيد قديمه ونادره جداً دلوقتي: الشبكه بتتفرد وتتساب تمشي مع التيار وبعدين تتلم في مكان تاني أبعد

ـ6ـ

إربه (2erba) أو لـَـقَّاف (البرلس):ـ

طريقة صيد مش قانونيه ومضره للحياه المائيه في بحيرة البرلس. الفلوكه بتجر وهي ماشيه شبكه طولها من 5 لـ6 متر وبتبقى محدوفه من واحد من جنابها الورّانيه. لما الصياد يحس إن وزن الشبكه تِقِل, يطلعها ويفضي كل اللي الشبكه جابته, ويرجع يرميها تاني, وعلى كده! للأسف طريقة الصيد دي بتخلص على كل الـ[زريعه] في البحيره ومابتسمحش لاكتمال دورة حياة السمك

====

بالسنار (الشـَرَك):ـ

ـ1ـ

الأُم والبــِنيَّه (عام) / الضَهر والرِماله (أسوان, بحر أحمر, فيوم) / البَدَن والساء (بحر أبيض, وجه بحري):ـ

Surface (or) Pelagic Longlining

طريقه وعِدة سنار أساسيه في الصيد في كل مصر. الفكره هي إن فيه خيط طويل رئيسي أفقي مع سطح البحر (الأُم), بيبقى نازل منه خيوط تانيه كتير رأسيه في العمق وكل خيط فيه سِنّاره (البــِنيَّه). المسافه مابين كل بــِنيَّه والتانيه بتختلف حسب المكان ونوع السمك اللي الصياد عايز يصطاده. عموماً, كل ما كان السمك كبير, كل ما كانت المسافه مابين البــِنيَّه والتانيه أكبر (ممكن توصل 3 متر). الشَرَك اللي من النوع ده بيتسبِّت بحاجات تقيله في أرض الميه (زي الـ [غطاس] مسلاً) عشان تيار الميه مايخدوش معاه. والصياد بيربط فيه [فِل] من فوق بيفضل عايم على وش الميه. فيه أنواع معينه من السمك في البحر الأحمر وبحيرة السد, بيبقو كُبار كفايه إنهم يقطعو الغزل, ومابينفعش يتصادو إلا بالطريقه دي. الصيادين عادةً بينزلو يرمو الشَرَك ده وقت الغروب, ويرجعو يلموه الصبح بدري. بعض الأوقات الصياد ممكن يرمي الصبح بدري تاني ويرجع يلم ساعة الغروب, وعلى كده, يبقى بيلم ويرمي مرتين بدل مره واحده في اليوم. أوقات بتتنطق “البدن والساج”, يمكن بمعنى “ساق” يعني رِجل!ـ

رسمه بتشرح طريقة صيد الأم والبنيه

رسمه بتشرح طريقة صيد الأم والبنيه

شكل عام للأم والبنيه

شكل عام للأم والبنيه

فيديو: صيد الأم والبنيه في البحر الأحمر (اللم)ـ

لَطْش (Latsh) (جُبلي, الفيوم): طريقة صيد بالسنار, زي [الأم والبنيه], بس السنار بيترمي من غير ما يتحط فيه طُعم. في أماكن معينه السمك وهو بيعوم بـ”يُلطُش” في السنار بأي حِته في جسمه. بتستخدم مخصوص في الميه الضحله أو اللي عمقها مش عالي 

ـ2ـ

وشَش, تسأييط, تجليب (بدو سينا) / توشيح (سويس) / حدّاف (سويس, بحر احمر):ـ

طريقة صيد الهواه؛ خيط ملفوف على بكره, فيه سنار او اتنين, بيتحط فيه طـُعم ويتحدف في الميه

فيديو صياد بدوي بيجَلِّب, أو بيسأّط, أو بيوِش, أو بيوَشـَّح (السويس), أو بيحدِف (البحر الاحمر):ـ

ـ3ـ

جَريره (بحر أحمر) / معلقه (بدو سينا)

Trolling

طريقة صيد بيطلع بيها سمك حجمه كبير: سمكه اصطناعيه معموله من الستانليس ستييل أو اشكال تاني كتير عشان تكون بتلمع, وملحوم فيها سناره, السمكه دي بتتجر بخيط او حبل قوي ورا مركب تكون ماشيه بسرعه بماتور, فتجذب انتباه السمك الكبير اللي بيحاول يصطادها. صيد القروش عادة بيبقى بالطريقه دي

واحده من اشكال السنانير اللي بتستخدم ف صيد الجريره

واحده من اشكال السنانير اللي بتستخدم ف صيد الجريره

رسمه بتوضح طريقة صيد الجريره

رسمه بتوضح طريقة صيد الجريره

ـ4ـ

سـَجاله (Sagaala) (بحر أحمر, بدو سينا):ـ

Chumming

جمع سَجَل, نوع طـُعم وطريقه صيد بيستخدمها صيادين السنار, عادة بيبقى حِتة حجر غويطه بيطحت جواها بواقي سردين أو ظفارة سمك وبيبقى مربوط فيها سنانير, وبتتساب في الميه يتجمع السمك حوليها

====

بالفخاخ:ـ

ـ1ـ

جابيا (Gabya) (عام, أو اوقات جوبيا) / سـَخوه(السويس, بدو سينا):ـ

طريقة صيد مشهوره في مصر: قفص معمول من الحديد أو السِلك القوي, وفي النيل معمول من النايلون, مفتوح من ناحيه واحده بيخش منها السمك ومايعرفش يطلع. بيتحط فيه [طُعم] ويترمي في الميّه في أماكن معينه بيجيها السمك. في أسوان بيتحط مابين العُشب قريب من شط النيل ومابيتحطش فيه أي طُعم. طريقة وعِدة صيد سهله ومشهوره في مصر

فـَخ الجوبيا أو الجابيا

فـَخ الجوبيا أو الجابيا

تفصيل الجوبيا

تفصيل الجوبيا

ـ2ـ

دوُره (البرلس وأوقات بيسموها “خَداوي”) / مناصب (سويس, بحر احمر) / خداوي (بحري):ـ

طريقة صيد مش قانونيه ومُضرّه للحياه المائيه. عِدَّه زي الشبك معمول من السلك, بتتفرد بشكل معين بالطول وتتغِرِز في أرض البحيره بعيدان البوص. السمك بيبقى محبوس في دوران معين للشبك بيسموه [عِلبه] (أو [مَناصب] في البحر الأحمر) والصياد بينزل يلِم السمك المحبوس بعده إسمها [شِلب

الدوُره أو الخداوي أو المناصب

الدوُره أو الخداوي أو المناصب

عِدِّة الدووره قبل ما تتفرد في الميه, البرلس

عِدِّة الدووره قبل ما تتفرد في الميه, البرلس

====

الصيد الآلي:ـ

Mechanized Fishing

الصيد الآلي كله بيبقى بالشبك, أحجام ومساحة الشبك بتبقى أكبر بكتير من الصيد العادي, والمراكب اللي بتشده بتبقى سُفُن كبيره وملاحتها مش بسيطه زي الفلوكه (شوف أنواع المراكب)ـ

الصيد الآلي في مصر موجود في البحر الأحمر والبحر الأبيض بس, مع ان ابتدى يبقى فيه سفن كبيره شويه وشعاله بونش وماتور قوي في بحيرة السد. فيه طرقتين اساسيتين في الصيد الآلي في مصر:ـ

ـ1ـ

الجـَر

Trawl fishing

(أوقات بيتقال عليها جووفه, في البحر الابيض مسلاً. الجووفه في المنزله بتتقال على نفس طريقة الصيد, بس بتبقى بشبك أصغر ومراكب اصغر ماشيه بماتور):ـ

المركب بتشد وراها شبكه طويله (متوسط 20 متر), على شكل قرطاس. الشبكه بتبقى مفتوحه وواسعه من الناحيه اللي واصله بالمركب (بتبقى مربوطه بالطريقه دي في مؤخرة المركب بحاجه إسمها [بَكَره] او اوقات بَكـّاره), والناحيه التانيه من الشبكه, بتبقى اضيق ومقفوله. الشبكه بتبقى متغطّسه في الميه بحلقات حديد أو ستانليس ستييل مش رصاص, المركب بتفضل تجُر الشبك وراها وبتلِم السمك وهي ماشيه. بعد كده الشبكه بتتلم بالـ[ونش]ـ

ـ طبالي: البكرتين اللي في المركب (عادة بيبقو متركبن ع الـ[عروسه]) وبيمسكو طرفين الشبكه بمساحه واسعه عن بعض

ـ بوّابه: الحديد اللي بيمسك الـ[طبالي]ـ

ـ شـَعره: إسم الخيط القوي والطويل, اللي بيبقى ماسك الشبكه من أولها لآخرها, بيتشد بالتوازي مع سحب الشبكه وقت اللم, عشان يقفل على السمك من تحت

الجـَر

الجـَر

ـ2ـ

شانشولـّه (واوقات شانشيلـّه)

 Purse seine

بعد ما القبطان بيحدد المكان والنطاق اللي ممكن يكون فيه نوع معين من السمك, بتنزل مراكب صغيره (عادة تلاته) تنور كلوبات نور فوق المنطقه دي. السمك عموماً بيتشد للنور. في نفس الوقت, المركب الكبيره بتنزل الشبك في نقطه, وتلف في دايره كبيره حولين المراكب الصغيره المنوره, يعني بتِقفِل بالشبك على كل السمك اللي بيتجمع على النور. وبعدين الشبكه بتتسحب من طرفينها اللي فوق واللي تحت على الونش من غير أي جَر

الشانشوله

الشانشوله

ـ مَروو (Maroo): بعض اوقات, النور اللي بيبقى طالع من الكائنات الرخويه (رخويات وسوطيات, بالانجليزي: Plankton) اللي بتطلع نور خفيف (غالباً أخضر) واللي بتبقى عايمه في البحر. لما بيبان في الميه, اوقات بيُعتبر علامه على وجود السمك ف المنطقه عشان السمك بياكلها , وممكن ريس المركب يقرر يرمي الشبك ويلمه من غير ما ينوَّر للسمك عشان يطلع. بيتقال أوقات صيد المَروو“, هي طريقة صيد زي الشانشوله بالظبط, بس مبنيه على ملاحظة نور المَروو بدل التنوير للسمك بكلوبات عشان يطلع

صوره للنور اللي بيبقى طالع من المَروو

صوره للنور اللي بيبقى طالع من المَروو

تجميعه مختلفه من المَروو, النور ده بيبقى غالباً علامه على وجود السمك في المنطقه دي وبيغني عن الحاجه لجذب السمك بنور صناعي

تجميعه مختلفه من المَروو, النور ده بيبقى غالباً علامه على وجود السمك في المنطقه دي وبيغني عن الحاجه لجذب السمك بنور صناعي

===================

فهرس القاموس:ـ

استفتاح

 طُرُق الصيد (انت هنا دلوقتي)ـ

عِدِّة الصيد

مكونات وصناعة المراكب

أنواع المراكب

الملاحه

الطبيعه

الحبال والخيوط, أنواعها وربطاتها

 =======================

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s