أنواع المراكب

أسامي أنواع مختلفه من المراكب:

ملحوظه عامه: كلمة “فلوكه” في الاستخدام العام مربوطه بنوع مركب محدد اللي هو فلوكه وجه جُبلي (اسوان), اللي بنشوفها دايماً في النيل واللي مرتبطه بنشاط السياحه عموماً. إنما مابين المراكبيه والصيادين, كلمة فلوكه هي مرادف لكلمة مركب, يعني اي مركب ممكن يتقال عليها فلوكه. الاستثناء الوحيد هو نوع المراكب اللي تكوينها مختلف في نقطه أساسيه (زي السُمبُك مسلاً): الفلوكه غالباً بتبقى مُدببه من قدام وعريضه من ورا (باستثناء فلوكة الفيوم وفلوكة البرلس, ودول تكوينهم وشكلهم مُميَّز جداً على كل حال), أي مركب واخده نفس الشكل ده, ممكن يتقال عليها فلوكه بغض النظر عن حجمها أو اختلافات تانيه فيها. نفس الحكايه بالنسبه لكلمة “سُمبُك”, أي مركب حجمه صغير ومُدبب من قدام ومن ورا (زي الهوري الهندي أو الدُنجـُل), ممكن يتقال عليه سُمبُك

فارغه (أو) تـَكنه (سويس) / طاكِن (البرلس): مرادفات لكلمة فلوكه أو مركب

حَسَكه (العريش, بدو سينا): فلوكه صغيره بتمشي بالمئداف

دِنجي (Dengi) (بدو سينا): نوع من الفلوكه في البحر الأحمر, وبتمشي أكتر بالمئاديف بس ممكن برضه بالشراع

سُكنه (sokna) (برلس) / سكونيا (بحر أبيض): (اوقات بيتقال عليها سُمبُك في البحر الأحمر) ده اسم المركب اللي بتطلع مع مراكب الصيد التانيه, بس بتبقى مخصوصه لسكن ومعيشة الصيادين في بحيرة البرلس (شوف فلوكة البرلس). سكونيا بتبقى مراكب شراع ضخمه كانت زمان (من 20 سنه تقريباً) بتشيل بضايع تقيله في البحر الأحمر والأبيض

سُمبُك (نيل): غالباً بيبقى معمول من الخشب بس فيه منو, خصوصاً الحجم الأكبر, معمول من الحديد. عموماً حجمه صغير و إيشّو زي برِوِّتو (يعني وشه زي آخره في الشكل, شوف مكونات وصناعة المراكب). بيمشي بمئداف أو بمِدرايه

السـُمبُك, جُبلي

السـُمبُك, جُبلي

سمبك كبير, اسكندريه

سمبك كبير, اسكندريه

شوتّي (Shotti) (بدو سينا, بحر أحمر): مركب كبير شويه وخفيه وسريه, بتمشي بماتور بس ممكن برضه بالشراع

طَرّاد (Tarraad) (المنزله والدقهليه): مركب كبيره بتمشي بماتور. ده غير طرّاد“, نوع سمك مشهور وغالي في البحر الأحمر (ناجل). المركب دي اصلها من الخليج, بتـُستخدم دلوقتي في مصر بعد رجوع الصيادين المصريين من الخليج

معوونه (بحيرة السد): نوع مركب كبيره شويه, زي فلوكة النيل بس بتمشي بالماتور. بيستخدمها أساساً تُجَّار السمك عشان يجمعو فيها السمك من الصيادين في بحيرة السد, بس أوقات بتُستخدم كمان في الصيد, وخصوصاً صيد سمك الملوحه اللي طريقة صيده بتحتاج فلوكه بماتور.

هووري (بحر أحمر): فلوكه صغيره, بتمشي بالمئداف, بوزها مدبب وعريضه من ورا. الفرق مابينها وبين الفلوكه العاديه انها مسطحه من تحت (مالهاش [كِشوه] أو [سكينه]). المصطلح ده غير هووري بمعنى ميه غويطه أو عمق عالياللي بيتقال في البحر الابيض

هووري

هووري

هووري هندي / دُنجـُل (البرلس): زي الهووري بس مدبب من قدام ومن ورا, زي السُمبك

====

فلوكه (وجه جُبلي):ـ

فلوكة جبلي

الطقيّه والطـُراف: حبال من السلك هي اللي بتثبت الصاري كويس, واصلين من فوق بالـ[طقيه] ومن تحت بفتحات في الفلوكه. الطـُراف إسمهم [فايا] في البرلس

طاقيه وطراف

جاريه: العصاية الطويله اللي بتبقى راكبه في الصاري وماسكه الشراع من فوق وقت فرد الشراع. مرادفات: فَرَمان (Faramaan) (سويس, منزله) / أريه (Arya) (البرلس, بحر ابيض) / دَجَل (بحر أحمر) / بووصه (فيوم)ـ

بوومه: خشبه طويله بتمسك الشراع من تحت لما يتفرد, مربوطه بجنزير [ماته], ومشدوده بحبل الـ[شغوول] عشان تقاوم الريح

شغوول: إسم حبل الـ[بوومه]ـ

ماتـَه: إسم الجنزير اللي رابط البوومه. مرادف [شكيته] فلوكة البرلس / راجه فلوكة الفيوم

جاريه بوومه شغوول

الماته, الجنزير اللي رابط خشبة البوومه من تحت

الماته, الجنزير اللي رابط خشبة البوومه من تحت

كانتاريسه: إسم الحبل اللي لما يتشد يلِم قماش الشراع, او يترخي فيفرده

عيار النوّا (3eyar e’nawwa): سِلك قوي وطويل بيحَجـِّم حركة الشراع في نطاق معين وبيمنعه يتحرك في اتجاه افقي

عيار النوه والكانتاريسهدَفيين: جيب طويل في قماش الشراع, بيخش فيه (يتدَكـِّك) الـ[كانتاريسه], يعني الحبل اللي بيفرد ويلم الشراع

سجّاطه (أو) صندوج (أو) صاجه: تكوين مربّع من الحديد مربوط بالعرض من تحت جسم الفلوكه, بيتحكم فيه المراكبي بجنزير من فوق لاجل ما يوازن ميل الفلوكه وقت شدة الريح او التحرك في اتجاه معين عكس/مع الريح

دَفَّه: تكوين معمول من الخشب في آخر الفلوكه وهو اللي بيحدد اتجاه الفلوكه في الميه. بيبقى نازل في الميه والمراكبي بيتحكم فيه بحاجه إسمها عصاية الدّقَّه” (Tiller)؛ لما المراكبي يحرك العصايا يمين بوز الفلوكه يروح شمال, والعكس بالعكس.

الدفه في فلوكه اسوان

الدفه في فلوكه اسوان

فلوكه (فيوم

P1010994الفلوكه في الفيوم ليها شكل خاص جداً مش موجود في اي حته تانيه في مصر. ممكن تمشي بالشراع أو بالمئداف, وفي حالة المئداف بتحتاج شخصين كل واحد على مئداف لانها كبيره وتقيله. الصاري والشراع ممكن يتشال او يتركب في اي بشكل عملي في اي لحظه, عادة اللي بيحدد ده هو وجود الريح أو عدمه (عني مالهاش صاري دائم متسبِّت بحبال سلك زي فواليك جُبلي او البرلس). بوزها (البَدَن) مُدبب جداً وبيقولو إن تصميمها بالشكل ده بيخليها تمشي بسرعه جداً بالشراع

فلوكة الفيوم تفصيل

أرفووص (Arfoos): الجزء القدماني في الفلوكه

بنك: الخشبه العريضه اللي بيدخل فيها الصاري 

عَتـَبه: مرادف (جاغوص: سُمبُك جُبلي), وبرضه المراكبي بيسند رجله عليها وقت التئديف

أوريمه (Orema): فتحه على شكل مثلث في مقدمة الفلوكه, بيقف جواهاالصياد وقت لم الشبك عشان ما يقعش. ماشوفتش زيها في أي مركب تاني في مصر, صيادين الفيوم بيقولو إنها مهمه عشان حركة المركب بعض اوقات بتبقى قويه جداً مع الموج لو فيه ريح, والمركب عموماً تصميمها بيساعد على خِفـِّة حركة المركب

هيكل فلوكة الفيوم مختلف شويه عن باقيت المراكب, ومعتمد أكتر على وصلة الاربطه بالضلوع واللي بكده بتمسك جسم المركب كويس

تفصيل فلوكة الفيوم2

صلايا: قاعده موازيه للـ[بنك] من تحت, بيتثبت فيها الصاري

رُباط (أو) زِند (Zend): إيد المئداف

أوّام (او) جَرّار: إسم الحبل اللي بيفضل في إيد المراكبي او الصياد, واللي بقوة شـَدُّه بيتحكم في مدى مقاومته للريح. مرادف حبل البوز في فلوكة البرلس أو الشغوول في فلوكه جبلي

بووصه: العصاية الطويله اللي بتبقى ماسكه الشراع من فوق وقت فرد الشراع. مرادفات [جاريه] (أسوان) / فَرَمان (Faramaan) (سويس, منزله) / أريه (Arya) (البرلس, بحر ابيض) / دَجَل (بحر أحمر)ـ

هلال: بوز المركب

المؤدِم (Mo2dem) والوسطاني: إسم المئدافين اللي في الفلوكه. الوسطاني هو اللي في نُص المركب, والمؤدِم هو اللي بعديه

المِؤدِم والوسطاني

المِؤدِم والوسطاني

 

فلوكه (البرلس

P1020101أكتر حاجتين بيميزو فلوكة البرلس هما الشكل البيضاوي للمركب, وحجمها الكبير جداً

صوره بتبين حجم فلوكة البرلس

صوره بتبين حجم فلوكة البرلس

تفصيله فلوكة البرلس

الكُشك والقافله: فتحات بتوصل لتحت سطح الفلوكه, وده بيبقى مكان واسع وكبير لمبيت ومعيشة الصيادين فترات طويله في رحلات الصيد البعيده من الشط واللي ممكن تستمر ايام طويله

موخار: مؤخرة الفلوكه

فايا: حبال السلك اللي ماسكه الصاري, مرادف طُراف في فلوكة جُبلي

إيريا (Erya): العصاية الطويله اللي بتبقى ماسكه الشراع من فوق وقت فرد الشراع. مرادفات: فَرَمان (Faramaan) (سويس, منزله) /  دَجَل (بحر أحمر) / بووصه (فيوم) / جاريه (جُبلي)ـ

جَصجووص: مئداف صغير

شكيته: إسم حبل او جنزير قصير بيبقى ماسك رابط الإريا ببوز المركب, مرادف [ماته] في فلوكة جُبلي

فلوكة البرلس كانت دايماً بتمشي بالشراع, وده عشان اصلاً استخدام الماتور ممنوع في بحيرة البرلس (زي ماهو ممنوع عموماً في اي بحيره في مصر, عشان بيضر بالحياه المائيه والميه في البحيرات). لكن دلوقتي بقى فيه فواليك بتمشي بالماتور في بحيرة البرلس, وده بنشوفه بوضوح في اختلاف شكل الفلوكه عشان تتماشى مع الملاحه بالماتور:ـ

فلوكة البرلس وتغييرات في شكل الموخار (مؤخرة المركب) عشان تستوعب الماتور

فلوكة البرلس وتغييرات في شكل الموخار (مؤخرة المركب) عشان تستوعب الماتور

 

مركب الصيد الآلي

whole

مراكب الصيد الآلي بتتميز بكبر حجمها وتـُقل العِده اللي فيها. بتُعتبر طريقة الصيد اللي فيها أعلى درجه من الحرفيه سواء كان على مستوى الملاحه أو طريقة الصيد. بتُستخدم لصيد كميات كبيره من السمك بطريقه احترافيه في ميه عميقه. فيه في مصر تلات طُرُق رئيسيه للصيد الآلي: الشانشيله, الجَر, و المَروو (Maroo), فيه وصف مفصل ليهم فـ طُرُق الصيد

على المركب بيكون فيه قبطان أو ريس, هو اللي مسئول عن الملاحه وكل القرارات اللي ليها علاقه بالصيد. ومعاه بيكون فيه عدد كبير من الصيادين, مابين 20 لـ 40 وممكن أكتر

صناعة المراكب دي مبني اصلاً على الخشب, ولكن في الفتره الأخيره ابتدا يكون فيه مراكب معموله م الحديد

مراكب الصد الآلي ممكن تتصنع من الحديد والمعادن, ورشة برج البرلس

مراكب الصد الآلي ممكن تتصنع من الحديد والمعادن, ورشة برج البرلس

صناعة مراكب الصيد الآلي في مصر بتُعتبر شغلانه كبيره جداً عشان فيه عدد كبير من العاملين المحترفين (نجارين) بيشتغلو فيها, في ورش مساحتها بتبقى واسعه جداً. مصر بتُعتبر دوله مُصدِره لمراكب الصيد الآلي في منطقة الشرق الأوسط, واللي يشوف الدقه والمهاره المطلوبه لبنا السفن الكبيره دي, يُعجَب بمهارة العمال والنجارين المصريين (شوف مكونات وصناعة المراكب)ـ

المناطق الأساسيه في صناعة سفن الصيد الآلي في مصر هي: رشيد (أكبر الورش في مصر), برج البرلس, دمياط, الاسكندريه, السويس (فيها صناعة لانشات كمان

***

 تفصيله مركب آلي

عيدان الخشب الأساسيه للمركب من قُدام, تحت, وورا, على الترتيب:ـ

البَدَن / الإطرَبل (Etrabl) ـ (Portside – or- Starboard) / الوسطانيه

رَفـّاص (Propeller): المروحه اللي بتبقى في مؤخرة المركب, بتلف بماتور قوي وهي اللي بتزق المركب لقدام. الماتور بيبقى ثابت على قعده (شاسيه أو كَمَره) في أرضية المركب, وله خزانات وقود خاصه بيه

دَفـّه (Rudder): زي دفة الفلوكه, بس القبطان بيتحكم فيها بالـ[دومان] مش بعصاية الدفه زي في الفواليك

الرفاص (لونه أصفر غامق), ورا الدفه (بلون احمر)ـ

الرفاص (لونه أصفر غامق), ورا الدفه (بلون احمر)ـ

دومان (Ship wheel): زي دريكسيون العربيه بس للمركب, هو اللي بيتحكم في اتجاه الدفه وبالتالي اتجاه المركب. بيبقى جوا الكابينه

الدومان

الدومان

 بيريتش (Beretsh) / بالانجليزي Superstructure: إسم الكابينه على سطح المركب

 عروسه: تكوين من الحديد في مؤخرة المركب, بيبقى فوق الونش وبيفوت من عليه حبال الشبك خصوصاً في صيد الجَر

بَخشه/باكابورت (بحر ابيض): مخزن في مراكب الصيد الآلي الكبيره.

وِنش: بيشد حبال الشبك وقت اللم. بيبقى تحت الـ[عروسه]ـ

winch_600

بوومه (بحر أحمر): خشبه متوصله في الونش, بترفع الشبك والمراكب الصغيره في صيد الشانشوله. غير بوومه بتاعت البحر الابيض وجُبلي, بمعنى خشبة البوص الهندي اللي بينزل منها الشراع

الوُرْد مان (و) الوُرد كابّو: أسامي لأجزاء مختلفه في الونش, ليها علاقه بشد الحبال

=========

فهرس القاموس:ـ

استفتاح

طُرُق الصيد

عِدِّة الصيد

مكونات وصناعة المراكب

أنواع المراكب (انت هنا دلوقتي)ـ

الملاحه

الطبيعه

الحبال والخيوط, أنواعها وربطاتها

=======================

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s